علاقات الأولاد بالبنات،

من طرف العاشق الصغير السبت 25 أبريل 2009, 8:15 pm

أنا شايف إن العلاقات بين الولاد والبنات دى من أكبر المشاكل اللى بتواجه مجتمعاتنا الشرقية. لأن إحنا مش عارفين نحدد أشكال للعلاقات بين الولاد والبنات، يعنى مثلا مش بنعرف نفرق بين الزمالة والصداقة والحب. الموضوع بسيط لو كنا واضحين مع نفسنا، الواحد مش محتاج يمشى ورا عادات وتقاليد تقوله هو المفروض يتعامل إزاى مع الناس اللى حواليه، لأن بكل بساطة الناس اللى حددوا العادات والتقاليد دول عمرهم ما هيكونوا أعلم بحال وبطريقة حياة الإنسان أكتر من نفسه.

أنا طبعا مش قصدى نهضم حق المجتمع أو نتجاهل تعاليم الدين وتشريعاته، ولا كمان بأقول نبقى زى دول بعيدة عننا ومجتمعاتها مش زى مجتمعنا، أنا قصدى إن على صعيد الأشخاص كل واحد لازم هو اللى يحدد حدوده مع زميلته أو زميله وكمان مع أصدقائه وصديقاته.

بالنسبة للمجتمع فالمسؤلية أكبر، لأن إحنا كمجتمع شرقى مترددين جدا فى موقفنا من الموضوع ده بالذات. برغم إن دور المجتمع بيبتدى براجل ويخلص بست. بيبتدى بالأب والمدرس والجار وكل الرجالة اللى شافهم الطفل وهو صغير بيتعاملوا إزاى مع الست أو البنت.

وبعد كده طول ما الواحد بيكبر بيشوف المجتمع اللى حواليه والبيئة اللى عايش فيها، فمثلا يلاحظ رد فعل أهله لو بنت زميلته فى المدرسة كلمته فى التليفون أو البنت تاخد بالها من كلام الناس اللى حواليها لو شافوا ولد وبنت بيتكلموا مع بعض فى الجامعة مثلا أو المدرسة.

طبعا زى ما إنتوا عارفين موضوع زى ده مليان إختلافات فى الرأى وفى الطريقة اللى كل واحد فينا بيشوفوا بيها، بس فى حاجة المفروض نبقى كلنا موافقين ومتفقين عليها، هى الاتزان، يعنى لو كل واحد فينا بيتعامل مع زميله أو زميلته بتوازن فى العلاقة، يعنى لا يكشروا فى وش بعض أول ما يشوفوا بعض وكمان ما يبقاش الموضوع مستفز للناس اللى حواليهم عشان صحيح مش كل العادات والتقاليد بتبقى صح، بس برضه إحترام التقاليد شىء مهم وأساسى لأن الحاجات دى اللى ممكن بعض الشباب يستهتر بيها هى أساس قيام المجتمعات.

كلمة أخيرة بس للشباب، فكر لحظة قبل كل مرة تتكلم مع بنت فيها إن البنت دى كان ممكن تبقى أختك. و كلمة أخيرة للبنات، كل إنسان مسؤل عن إختياراته، فلما تختارى أصدقائك إختارى صح

من طرف mr_chat السبت 25 أبريل 2009, 11:05 pm

أنا قصدى إن على صعيد الأشخاص كل واحد لازم هو اللى يحدد حدوده مع زميلته أو زميله وكمان مع أصدقائه وصديقاته.

لو تركنا كل واحد يحدد! ف ناس محترمه جدا وفى ناس برضه مش محترمه خالص وحتى لو قلت اللى ترضاه لنفسك ترضاه ع غيرك هتلاقى ناس باصه تحت رجلها تقلك كلام غريب اللى هيقلك انا مليش اخوات والتانى انا اختى محترمه وهكذا انا من وجهة نظرى مفيش احسن من" افعل ما شئت كما تدين تدان "
"وعفوا تعف نسائكم " او كما قال صلى الله عليه وسلم
ومعاك قوى ف اخر سطر (البنت دى كان ممكن تبقى أختك)
بس اهم حاجه اللى تتقله يبقى محترم !

شكرا كتييير ع الموضوع اللى عامل فعلا مشاكل الايام دى كتير

علاقات الأولاد بالبنات،

علاقات الأولاد بالبنات،

رد: علاقات الأولاد بالبنات،