بنحبك.. مهما نقاسى منك

بنحبك.. مهما نقاسى منك

٧/ ٤/ ٢٠٠٩
ناديت بأعلى صوت والدنيا سمعانى.. أصل «السكوت ممنوع» ع الظالم وع الجانى.. بطلت أبيع الصبر وقفلت دكانى.. ومشيت فى عز البرد وموجة البرد لفحانى.. وحضن أمى شوك يا ريتو دفانى.. حرمت أسكت ولو فى إيدين سجانى..

وكلمة الحق سيف ضد الحيف مطبوعة ف لسانى.. ولسانى كلمة حق هى سرجى وحصانى.. وحصانى جامح وقلمى طايح فى كل عدوانى.. ومهما ضربنى الموج هسبح وارجع للشط من تانى.. يا ناس دى بلدى أفديها بروحى وكيانى.. أنا أصلى مصرى وأبويا مصرى وآدى عنوانى.

صبرى عبدالظاهر محمد

المنيا - مطاى - شارع الثورة

السكوت ممنوع.. خلاص السكوت ممنوع.. خلاص مفيش رجوع.. ما أنا عشت كتير مخدوع.. وبأقول على نفسى قنوع.. راضى وراسى مرفوع.. وأتارى نصيبى دموع.. وزادى هو الجوع.. وصوتى ماهوش مسموع.. وحقى ماهوش مشروع.. ولازم أعيش موجوع.. ما أنا حمل تقيل وسخيف.. ما أنا أصلى ابن البطة.. لو كنت جدع وخفيف.. وعاملتهم بأونطة.. كنت أبقى جميل وشريف.. وصورى ف كل حتة..

واكمنى أنا قلبى خفيف.. غلطت أنا أكبر غلطة.. ما أنا عشت أحلم برغيف.. وسبت لغيرى الفتة.. فأستاهل أقف طوابير.. وأموت علشان أنبوبة.. واكمنى ساكت وفقير.. أستاهل أموت ميت نوبة.. ما أنا أصلى سكت كتير.. على الذمم المخروبة.. وخلاص مش هاسكت تانى.. ع الأوضاع المقلوبة.. وأبدأ دلوقتى بنفسى.. وأعلن قدامكو التوبة.

خالد عبدالفتاح جلال

[ندعوك للتسجيل في المنتدى أو التعريف بنفسك لمعاينة هذا الرابط]

كان الكلام وسط الزحام إيه الكلام متفهموش.. فيه ناس تهلفط وناس تبلبط وناس كلامها يطلع فاشوش.. كان الزحام عند الميدان.. وشوش كتير شايله نعوش.. قال إيه اعتصام من غير كلام.. قال إيه مظاهرة وميهتفوش.. وأنا كنت ماشى ولقيتنى فجأة.. بين المعارك وسط الجيوش.. عسكر كتير ملهاش مثيل.. واللبس ميرى يدارى الكروش.. والحرب قامت وبلادى نامت.. وكل الشطارة حفظ العروش.. وأخدلى ضربة وعلى راسى خبطة.. وكل ده وميكفهوش.. وطلعت أجرى ولقيتلى رجلى تدوس ع ناس ميهمنوش.. وأنا بس مالى وأعمل إيه..

أنا همى أهرب من الوحوش.. وروحت بيتى ودمى سايح.. جروح كتير دى ولاّ خدوش.. وقلبى يبكى ع اللى بيحصل.. وعنيا تسهر ولا يناموش.. وفت تانى على الميدان.. وشفت من تانى الزحام.. من غير سلام ولا كلام.. لقيتنى واقف مع الوشوش.. وشايل مع الناس النعوش.. واللى حصل أنا منساهوش!

محمد أحمد خليل

[ندعوك للتسجيل في المنتدى أو التعريف بنفسك لمعاينة هذا الرابط]

بادعيلك تعدى أزمة هذا العصر.. بادعيلك فى كل صلاة عصر.. تخرجى من هذا العسر.. أصل بلدنا بقى فيها أكتر من مليون قصر.. وكمان ناس عايشين فى القبر.. والشعب لا يملك إلا الصبر.. وبقى فيها (كامبوند) مالهوش حصر.. بقى فيها فساد من القدم للراس.. بقى فيها تعليم لا يدخل راس.. وكل شوية كام حادثة قطر.. وتوك توك نزل كله فى شهر.. بقى فيها ناس نازلين هبر..

عشان محدش عايز يقول كده هدر.. لمال بلدنا اللى عليه أحكام بالحجر.. لو مسددناش ديونا ع الفور.. حتى الضرايب بيدفعوها بقدر.. والقرارات بتتاخد برمى الزهر.. والمدرسين ماخدوش الكادر.. والعمال حاسين بالغدر.. لان مصنعهم ممكن يتباع فى سوق العصر.. وإحنا لينا مين غيرك يا مصر.. وإن شاء الله هييجى النصر.. وكفاية كده قصور.. والحمد لله الذى أحيانا بعد أن أماتنا وإليه النشور.

هشام عبدالحميد محمد

نفسى كل واحد فينا ينغز ضميره بإبرة.. ويطهر روحه قوام ويقف قدام أى قبلة.. ويدعى لبلدنا كتير علشانها حبلى.. أيامها قربت وعلاماتها خلاص بانت.. اترعشت واتكهربت دى باينها هانت.. فيه ناس كتير خرجت وعقول كتير خانت.. وناس كتير واقفة على بابها بتدعيلها.. وجابولها ميه زلال والميه من نيلها.. ولادتها ليه اتعسرت دى بلدنا ياما عانت.. ادعولها يجى الفرج وترجع زى ما كانت.

محمد بدر

أنا عاشق يا بلادى.. وكاوينى الصب وبحبك حتة دين حب.. أتغرب وأجرب بلاد تانية غيرك.. وأعود من جديد لترابك.. وأحلف ميت يمين والله ما ليا غيرك.. ساعات أكرهك وألعن سلسفيلك.. ولما عنيا تلاقى عيون ضيك ونيلك.. أخجل من نفسى قوى وأرجع وأجيلك.. وأقولك يا غالية سامحينى.. دانا كداب فى أصل وشى.. دا فى حضنك أحلامى عشى.. دا أنا دايب والله صبابة..

مواويلك غنيتها يا غالية.. مرة بعود وبمرة ربابة.. تايه سواح فى بلاد الله بغنيلك وبغنيكى.. وغناكى كان لى دليل.. كل الناس تاهت ف عنيكى.. بس أنا لا أنا عارف فين ألاقيكى.. أتوه عنك؟ وتوّهى عنى.. أاباى.. طيب تيجى إزاى.. هو اللى شايل وطنه جواه يفكر لو تاه عنه إزاى يلقاه؟!

تمام اوى تسلم ايدك يا مان