عشان انت مصرى

من طرف **قوت القلوب** الأحد 08 مارس 2009, 6:27 pm

عشان انت مصرى لازم تعانى

وتفقد كرامتك بكل المعانى

وتحرق فى دمك سنين مش ثوانى

واوعى تصدق كلام الاغانى

بتاع الحضاره وكانى ومانى

ده كله هجايص مايدخل ودانى

عشان انت مصرى العذاب بيناديك

بتبدا فى يومك حاجات بترازيك

فى نومك فى قومك تعكنن عليك

تضايقك ولسه العماص فى عينيك

مافيش ميه تشطف صابونه فى ايديك

وجسمك ملزق وريحتك عاديك

فتلبس وتنزل وفيك اللى فيك

ورايح لشغلك حتحتاج مواصله

ادى المترو واقف وكهربته فاصله

وفى الميكروباص خناقه وحاصله

اوتوبيس فرامله عايزالها وصله

وتوك توك ده تايه ومحتاج لبوصله

بتوصل لشغلك بدم اتحرق

فى زحمه وكتمه وحر وعرق

رئيسك سايبلك كومه ورق

ده غير دمغه ضايعه وملف اتسرق

وفى كام مواطن عامللك قلق

بيشكى تقول له روح اندعق

وعركه وهوجه وشاى اندلق

ومخك خلاص من الصداع اتفلق

هترجع لبيتك ده لو كان فى بيت

هتوصل هتندم ياريتك ماجيت

مراتك بتصرخ خلاص استويت

عيالك بتطلب وهات كيت وكيت

تزعق تهاتى ياناس اتهريت

ولاحد سامعك مهما هاتيت

عشان انت مصرى وده للاسف

فلازم تاسى تعيش تتقرف

وكل الاساسى فى حياتك ترف

فتنسى الكرامه وتنسى الشرف

وتسرق وتنصب او تنحرف

ودمعك بيجرى وجرحك نزف

مش انت اللى مصرى؟؟؟ جتك القرف

Neutral

من طرف حوده الخميس 09 أبريل 2009, 6:13 pm

لاحول ولا قوة إلابالله... شعر والله يكره الواحد انه يكون مصرى ....ياعالم فى فرق بين معانة ظلم الحكومة او طبقة الحكم وبين حب البلد... حب البلد من الإيمان بدليل لماذا يقتل الخائن فى الحرب(بحكم الشرع) او ان الفرار من الزحف يعد من الكبائر ثانيا عندما جاء الصحابى مغزاة من مكه بعد هجرة النبى (ص) سألته السيدة عائشة ماحال مكه يا مغزاة فاخذ يوصف لها حال المكان والناس وكان ذلك على مسمع من الرسول صلى الله عليه وسلم فرد عليه وقال كفى كفى دع القلوب تقر يامغزاة فهل راى الرسول من اهل مكه ال كل ظلم واستبداد له ولصحابته وكان فى وسعه ان يدعو عليهم فيهلكهم اجمعين ولكن ماذا قال حين خرج منها مهاجرا قال والله لأنت احب بقاع الأرض الىّ ولأن اهلك اخرجونى منك ماخرجت وعندما رجع صلى الله عليه وسلم لم ينتقم منهم او يقتص منهم كما فعلوا معه ولكن قال لأهلها اذهبوا فانتم الطلقاء اليس هذا دليل على حب البلد مع كراهية النظام الفاسد الذى لا يصد عن فكر ليبرالى او ديمقراطى بل يصد عن شرع الله.. و هى البلد (مصر ) مش هى انا وانت واخويا واخوك هى البلد شوية طوب وحجارة ويكفى ان مصر البلد الوحيد التى ذكرت فى القرآن الكريم كلام رب العزة اليس هذا مدعى لحب البلد مع حق الاختلاف مع النظام القائم ولاايه رأيك

عشان انت مصرى

عشان انت مصرى

رد: عشان انت مصرى